သဲကုန်းမှာ လယ်သမားတွေနဲ့ ရဲတပ်ဖွဲ့ကြား ရုန်းရင်းဆန်ခတ်ဖြစ်

Wednesday,May 7, 2014

ပဲခူးတိုင်း သဲကုန်းမြို့ နယ်မှာ အသိမ်းခံလယ်တွေပြန်ရရေးတောင်းဆိုရာ ကနေ တရားစွဲခံထားရတဲ့ လယ်သမားတွေထဲက ကိုပေါက်စဆိုသူကို သဲကုန်းမြို့ နယ်တရားသူကြီးက အာမခံမပေးပဲ မနေ့က ပေါင်းတည်ထောင် ကိုပို့ ခဲ့ရာကနေ မိသားစုဝင်တွေနဲ့ ရဲတပ်ဖွဲ့ ကြားရုန်းရင်းဆန်ခတ်ဖြစ်ပြီး၊ ရဲတပ်ဖွဲ့က အကြမ်းဖက် ဖြေရှင်းတဲ့အတွက် ကိုမာနော်ဆိုသူအလွတ် သတင်းထောက်တစ်ဦး နဲ့  ဒေါ်ဝင်း ဆိုသူ လယ်သမားမိသားစုဝင် အမျိုးသမီးတစ်ဦး ထိခိုက်ဒဏ်ရာရပြီး ပေါင်းတည်ဆေးရုံတင်လိုက်ရတယ် လို့ သိရပါတယ်။ဒီဖြစ်ရပ်နဲ့ ပတ်သက်လို့  လယ်သမားတွေကိုကူညီနေတဲ့ မဇင်မာက RFA ကိုအခုလိုပြောပါတယ်။

"ကိုပေါက်စက ပေါင်းတည်ထောင်ကို ပြောင်းမိန့်ကျတော့ ဒီလယ်သမားတွေ နဲ့ အမျိုးသမီးတွေကနေပြီးတော့ သူတို့ပါလိုက်မယ်ဆိုပြီးတော့မှ ကိုပေါက်စ ကို အတူတူဆွဲတဲ့အခါ ရဲတွေကလည်းဘဲ ဒါကတော့ မဖြစ်နိုင်ဘူး တရား သူကြီး ဆုံးဖြတ်ထားတဲ့သူဘဲ သူတ်ို့ကသွင်းမှာ ဆိုပြီးတော့မှ ကိုပေါက်စ ကိုလုကြရင်းကနေပြီး ရဲတွေကနေပြီး ဆွဲရင်းလွဲရင်းကနေပြီး မာနော်ဆိုတဲ့ ခလေးတစ်ယောက်ကို ထိုးတယ် သူက အလွတ်တန်း သတင်းထောက် လုပ်နေတာပေ့ါ ထိုးတော့ကောင်လေးက အခုလောလောဆယ် ပေါင်း တည် ဆေးရုံမှာတင်ထားရတယ် နံရိုးအောင့်တယ်လို့ ပြောတယ်၊ဒေါ်ဝင်း ကိုတော့ ရဲတွေက တွန်းထုတ်ရာကနေပြီး ဒေါ်ဝင်းက နောက်ပြန်လန် ပြီးတော့လဲသွားတာ လောလောဆယ် သူ့မှာခေါင်းကို အထိခံလို့မရဘူး၊ ဆရာဝန် က ဓါတ်မှန်ရိုက်နေတယ်"

စစ်တပ်ကသိမ်းထားတဲ့ လယ်တွေပြန်ရဖို့ တောင်းဆိုနေတဲ့ လယ်သမားတွေ ထဲက ၄ ယောက်နဲ့ သူတို့ကို ကူညီနေတဲ့သူ ၁ ယောက်ကို ပုဒ်မ ၅ဝ၅ (ခ) ဆူပူအောင်လှုံ့ ဆော်မှု၊ ပုဒ်မ ၁၈ တရားမဝင် စီတန်း လှည့်လည်ဆန္ဒပြ မှုတွေနဲ့ သက်ဆိုင်ရာကတရားစွဲထားတာပါ။ တရားစွဲခံထားရတဲ့ လယ် သမား ၄ ယောက် က ကိုပေါက်စ၊ မညို (ခေါ်) မဌေးဌေးညို၊ ဒေါ်မုန်း၊ ကိုကျော်သူ တို့ ဖြစ်ပြီး၊ သူတို့ ကိုကူညီ ပေးလို့  တရားစွဲခံထားရသူက နတ္တလင်းမြို့ က ကိုသန့် စင်ထက် ဆိုသူဖြစ်ပါတယ်။ မနေ့က ရုံးချိန်းကို ၃ ယောက်ပဲသွားနိုင်ခဲ့ပြီး အဲဒီထဲက ဒေါ်ဌေးဌေးညိုနဲ့ ဒေါ်မုန်းတို့ ကို အာမခံပေးလိုက်ပေမယ့်၊ ကိုပေါက်စကိုတော့ အာမခံမပေးပဲ ပေါင်း တည်ထောင် ကို ပို့ဖို့စီစဉ်ခဲ့ရာကနေ အဲဒီလို ပို့ဆောင်ခြင်းမပြုဖို့ တားဆီး သူတွေနဲ့ အာဏာပိုင်တွေအကြား ပဋိပက္ခဖြစ်ခဲ့တာပါ။

အဲဒီ လယ်သမားတွေဟာ ဖေဖေါ်ဝါရီလက သဲကုန်းမြို့ မှာသပိတ်စခန်းဖွင့်ပြီး လယ်ပြန်ပေးဖို့  တောင်းဆိုခဲ့ကြပါတယ်။ အဲဒီအချိန်ကလဲ ရဲတပ်ဖွဲ့ က အင်အားသုံးနှိမ်နင်းပြီး သဲကုန်းမြို့ ကနေ နှင်ထုတ်လိုက်တဲ့အပြင် ပုဒ်မ ၁၈ နဲ့ တရားစွဲလိုက်တဲ့အတွက် သူတို့ နေထိုင်တဲ့ အောင်ကုန်းရွာမှာ ပဲပြန်ပြီး လက်ရှိကာလထိသပိတ်စခန်းဖွင့် တောင်းဆိုနေကြတာ ဖြစ်ပါတယ်။ ပြီးခဲ့တဲ့သင်္ကြန် မတိုင်ခင်ကတော့ လယ်သမားတွေက ကျိန်စာတိုက်တယ်ဆို ပြီး အဓမ္မလယ်သိမ်းတာကို ဆန့်ကျင်ခဲ့ကြတဲ့အတွက် ပုဒ်မ ၅ဝ၅(ခ)နဲ့ ထပ်မံ တရားစွဲခံလိုက်ရပါတယ်။

သဲကုန်းမြို့နယ် အောင်ကုန်း၊ သင်တော၊ ကဇွန်းအင်း၊ ယင်းတိုက်တန်း နဲ့ နှောကုန်းကျေးရွာ ၅ ရွာက လယ်မြေဧက ၅ ထောင်ကျော်ကို တပ်မ ၆၆ လက်အောက်ခံ ခလရ ၈ဝ က စစ်တပ်ရန်ပုံငွေ အတွက် ဆိုပြီး လွန်ခဲ့တဲ့ ၂ဝဝဝ ခုနှစ်ကသိမ်းဆည်းခဲ့တာလို့ လယ်သမားတွေက ပြောကြပါတယ်။

RFA Burmese